ဖေဖော်ဝါရီလ ၂၁၊၂၀၂၃။

ပွင့်သစ်စအစီရင်ခံစာသည် မြန်မာနိုင်ငံတွင် ကုမ္ပဏီစီးပွားရေးလုပ်ငန်းများဆိုင်ရာ ကော်ပိုရိတ်ထုတ်ဖော် ကြေညာခြင်းနှင့်ပတ်သက်၍ ပြည့်စုံပြီးကျယ်ပြန့်မှုအရှိဆုံးဖြစ်သော အများပြည်သူဆိုင်ရာ အစီရင်ခံစာတစ်စောင် ဖြစ်ပါသည်။ ဤအစီရင်ခံစာကို ဖြစ်နိုင်ခြေရှိသည့် သက်ရောက်မှုများအား ကြိုတင်သိမြင်ရန် စစ်ဆေးခြင်း (Due diligence) ဆောင်ရွက်ရာတွင် နိုင်ငံတကာအဖွဲ့အစည်းများနှင့် ကုမ္ပဏီများက ရည်ညွှန်းချက်တစ်ခုအနေဖြင့် ကိုးကားအသုံးပြုလျက်ရှိပါသည်။
ကျွန်ုပ်တို့ Proven Group of Companies Limited သည် ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုများအား ဖော်ဆောင်လျက်ရှိသည့် ကုမ္ပဏီတစ်ရပ် ဖြစ်ပါသည်။ သို့ပါ၍ မြန်မာစီးပွားရေး လုပ်ငန်းများ၏ ပွင့်လင်းမြင်သာမှုကို တိုးမြှင့်စေရန်နှင့် ပိုမိုကောင်းမွန်သော ကော်ပိုရိတ်စီမံအုပ်ချုပ်မှုများ ဆောင်ရွက်လာစေရေးအတွက် တိုက်တွန်းအားပေးရန်ရည်ရွယ်၍ ဆောင်ရွက်လျက်ရှိသော ပွင့်သစ်စ အစီရင်ခံစာတွင် ၂၀၁၉ ခုနှစ်မှစ၍ မိမိတို့သဘောဆန္ဒအလျောက် ဝင်ရောက်အကဲဖြတ် အမှတ်ပေးမှုခံယူခဲ့ရာ ၂၀၁၉ ခုနှစ် တွင် အဆင့် ၃၃ အဖြစ်လည်းကောင်း၊ ၂၀၂၀ ပြည့်နှစ်တွင် အဆင့် ၁၈ အဖြစ်လည်းကောင်း အသီးသီး သတ်မှတ်ဖော်ပြခြင်းခံခဲ့ရပါသည်။ ယခုနှစ် ၂၀၂၂ ခုနှစ် တွင်ထုတ်ပြန်သည့် သတ္တမအကြိမ်မြောက်အစီရင်ခံစာ တွင် ကုမ္ပဏီပေါင်း ၂၇၁ ခုအား ရွေးချယ်စစ်ဆေးခဲ့ပြီး၊ Proven Group of Companies Limited သည် အဆင့် ၁၃ အထိသို့ တက်လှမ်းရပ်တည်နိုင်ခဲ့ပြီဖြစ်သည်။
Proven Group Of Companies သည် ကိုဗစ်ကာလနှင့် အခြားစီးပွားရေးစိန်ခေါ်မှုအခက်အခဲများကို Risk Management Awareness ဖြင့် ဒါရိုက်တာအဖွဲ့နှင့်စီမံအုပ်ချုပ်မှုအဖွဲ့တို့၏ ကြိုးပမ်းအားထုတ်မှုဖြင့် ကျော်လွှားခဲ့ပါသည်။ ထို့အပြင် ရေရှည်တည်တံ့ခိုင်မြဲမှုရှိစေရေးအတွက် ပိုမိုခိုင်မာကောင်းမွန်သော ကော်ပိုရိတ် အစဉ်အလာ ဖန်တီးတည်ဆောက်ခြင်း၊ ထိရောက်မြန်ဆန်သော ဆုံးဖြတ်ချက်များချမှတ်ခြင်းနှင့် ဖော်ဆောင် လုပ်ကိုင်ခြင်းတို့ကို အစဉ်တစိုက်ကြိုးပမ်းလုပ်ဆောင်လျက်ရှိသည့်အပြင် ရေရှည်တည်တံ့ခိုင်မြဲမှုဆိုင်ရာ မျှော်မှန်းချက်များနှင့် ပိုမိုကောင်းမွန်သော လုပ်ဆောင်ချက်များ ဖော်ပြပါရှိသည့် ရေရှည်တည်တံ့ ခိုင်မြဲမှုဆိုင်ရာ အစီရင်ခံတင်ပြခြင်း (Sustainability reporting) ကိုလည်း Proven Group Of Companies ကုမ္ပဏီဝက်ဘ်ဆိုဒ်တွင် ထုတ်ပြန်ထားရှိပါသည်။
ယခုကဲ့သို ပွင့်လင်းမြင်သာမှုကို ဆန်းစစ်သည့် “ပွင့်သစ်စအစီရင်ခံစာ ၂၀၂၂” တွင် အဆင့် (၁၃) နေရာတွင် အသိအမှတ်ပြုခံရခြင်းအတွက် ဂုဏ်ယူဝမ်းမြောက်မိပါသည်။ ကော်ပိုရိတ်စီမံအုပ်ချုပ်ရေးနှင့် ရေရှည်တည်တံ့ ခိုင်မြဲမှုဆိုင်ရာနှင့် ပတ်သက်၍ အသိပညာပေးမှုများသည် ကျွန်ုပ်တို့၏ဝန်ထမ်းများ၊ စီမံအုပ်ချုပ်သူများအား လွှမ်းခြုံထားသည့် ကြိုးပမ်းမှုတစ်ခု ဖြစ်ပါသည်။
ကျွန်ုပ်တို့နှင့်အတူ ပိုမိုကောင်းမွန်သော စီးပွားရေးရပ်ဝန်းနှင့်ရေရှည်တည်တံ့ခိုင်မြဲသော လူမှုပတ်ဝန်းကျင်ကောင်း ဖြစ်စေရေး အတူပူးပေါင်းပါဝင် ဆောင်ရွက်ကြပါသော ပုဂ္ဂိုလ်များအားလုံးကို ကျေးဇူးတင်အပ်ပါသည်။ ဆက်လက်၍လည်းခိုင်မာသည့်ကော်ပိုရိတ်စီမံအုပ်ချုပ်မှုနှင့်ရေရှည်တည်တံ့ခိုင်မြဲမှု၊ ပွင့်လင်းမြင်သာမှုတို့အပေါ် ထားရှိအပ်သော ကျွန်ုပ်တို့၏ ကတိကဝတ်ကိုဆက်လက် ကြိုးပမ်းအကောင်အထည်ဖော်ဆောင်ရွက်သွားမည် ဖြစ်ပါသည်။

ပွင့်သစ်စအစီရင်ခံစာ ၂၀၂၂ ကို အောက်ပါ Link တွင် ဒေါင်းလုတ်ရယူနိုင်ပါသည်။

https://www.myanmar-responsiblebusiness.org/pdf/TiME/2022-Pwint-Thit-Sa_en.pdf

https://www.myanmar-responsiblebusiness.org/pdf/TiME/2022-Pwint-Thit-Sa_my.pdf